कृषिमालाच्या विक्रीव्यवस्थेसाठी महाराष्ट्र आणि पंजाबमध्ये सामंजस्य करार

मुंबई:- महाराष्ट्र आणि पंजाब राज्यातील विविध कृषिमाल तसेच कृषी प्रकिया मालाची परस्परांच्या विपणन व्यवस्थेच्या माध्यमातून विक्रीचे जाळे उभारण्यासंदर्भात तीन सामंजस्य करार करण्यात आले. पणनमंत्री सुभाष देशमुख आणि पंजाबचे सहकारमंत्री सुखजिंदरसिंग रंधावा यांच्या उपस्थितीत या करारांवर स्वाक्षरी करण्यात आली.

महाराष्ट्र पणन महासंघाचे (महामार्कफेड) आणि पंजाब मार्केटिंग फेडरेशन (मार्कफेड), विदर्भ पणन महासंघ आणि पंजाब मार्कफेड तसेच महाराष्ट्र सहकार विकास महामंडळ (एमसीडीसी) आणि पंजाब मार्कफेड यांच्यात हे सामंजस्य करार करण्यात आले. राज्यातील सहकारी पणन व्यवस्था बळकट करण्यासाठी महाराष्ट्र शासन अटल महापणन विकास अभियान राबवत आहे. त्याचा एक भाग म्हणून आयोजित बैठकीत हे करार करण्यात आले. पंजाबमधील आमदार हरप्रतापसिंग अंजाला, पंजाब मार्कफेडचे अध्यक्ष अमरजीतसिंग समरा, सहकार विभागाचे अपर मुख्य सचिव एस. एस. संधू, कृषी विभागाचे अपर मुख्य सचिव विजय कुमार, पंजाबच्या सहकार विभागाचे अपर मुख्य सचिव डी. पी. रेड्डी, राज्याचे सहकार आयुक्त डॉ. विजय झाडे, महामार्कफेडचे व्यवस्थापकीय संचालक डॉ. योगेश म्हसे, विदर्भ पणन महासंघाचे व्यवस्थापकीय संचालक हरी बाबू, पंजाब मार्कफेडचे व्यवस्थापकीय संचालक वरुण रूजम, अतिरिक्त व्यवस्थापकीय संचालक बी. एम. शर्मा, महामार्कफेडचे अतिरिक्त व्यवस्थापकीय संचालक शिवाजी पाहिनकर आदी यावेळी उपस्थित होते.

पंजाब मार्कफेडच्या सोहना या कृषिप्रक्रिया उत्पादनांचे नाव देशात आणि आंतरराष्ट्रीय पातळीवर पोहोचलेले आहे. उत्तर भारतात या ब्रॅंडला खूप चांगली मागणी आहे. तसेच महाराष्ट्रातील वेगवेगळ्या जिल्ह्यांची वैशिष्ट्ये असलेली सेंद्रीय गूळ, हळद पावडर, ज्वारी, बाजरी, इंद्रायणी, श्रीराम, वाडा कोलम आदी तांदळाच्या जाती, हिमरु शाल, मालवणी मसाला, काबुली चना, लातूर डाळ, केळीचे वेफर्स आदी पदार्थांची चव देशात वैशिष्ट्यपूर्ण अशी असते. या पदार्थांचे ब्रँडिंग करुन पंजाब मार्कफेडच्या मॉलमधून विक्री करण्यास मोठा वाव आहे. तसेच पंजाबच्या सोहना या ब्रँडसह अन्य उत्पादने महामार्कफेड आणि विदर्भ पणन महासंघाच्या विक्री केंद्रातून विक्रीसाठी मोठी संधी आहे. त्यादृष्टीने या कराराचे महत्त्व लक्षात येते.

यावेळी श्री. देशमुख म्हणाले की, परस्परांच्या राज्यातील कृषीमाल तसेच कृषी प्रक्रियायुक्त पदार्थांच्या विक्रीचा व्यवस्था निर्माण केल्यास दोन्ही राज्यांमधील शेतकऱ्यांच्या मालाला चांगला दर मिळू शकेल. पंजाब राज्य कृषीच्या बाबतीत देशामध्ये अग्रगण्य आहे. तसेच तेथील शासनाच्या पणन महासंघामार्फत कृषीमालावर अत्याधुनिक पद्धतीने प्रक्रिया केली जाते. पंजाबने केलेल्या ब्रँडिंगच्या पद्धतीचा उपयोग महाराष्ट्रातील कृषिप्रक्रिया व ब्रँडिंगसाठी करण्यास इच्छुक आहोत. त्यासाठी पंजाबने सहकार्य करावे.

ते पुढे म्हणाले की, राज्यामध्ये महामार्कफेड आणि विदर्भ पणन महासंघाची विक्री केंद्रे आहेत. त्या माध्यमातून पंजाबमधील कृषिप्रक्रिया केलेल्या उत्पादनांना विक्रीसाठी जागा उपलब्ध करुन देण्यात येईल. त्याचप्रमाणे पंजाब मार्कफेडच्या मॉलमधूनही महाराष्ट्राच्या कृषी आणि कृषिप्रक्रिया मालाला विक्रीसाठी जागा उपलब्ध करुन द्यावी.

पंजाबचे सहकार त्री श्री. रंधावा म्हणाले की, पंजाब आणि महाराष्ट्राचे भावनिक नाते आहे. पंजाबला अभिमान असलेले संत नामदेव महाराष्ट्रातून पंजाबला आले तर बंदा‍ सिंग बहादूर यांचेही महाराष्ट्रात बऱ्याच कालावधीसाठी वास्तव्य राहिले. दोन्ही राज्यांमध्ये विविधतेतही अनेक साम्ये आहेत. त्यामुळे शेतकऱ्यांच्या विकासासाठी दोन्ही राज्ये परस्पर सहकार्याची भूमिका घेतील असा विश्वास आहे. महाराष्ट्रातील सहकार क्षेत्राला खूप जुनी परंपरा आहे. पंजाबने कृषी विकासात आणि कृषिमालाच्या मार्केटिंग मध्ये केलेले कामाची पद्धतीची माहिती घेण्यासाठी महाराष्ट्राच्या शिष्टमंडळाने पंजाबला यावे.

दोन्ही राज्यांमध्ये तात्काळ परस्परांच्या पणन महासंघांच्या विक्री केंद्रांमध्ये विक्रीसाठी जागा उपलब्ध करुन देण्याचे ठरले. महामार्कफेडच्या मुंबईतील ६८ विक्रीकेंद्रांसह सोलापूर मध्ये महामार्कफेड आणि नागपूर पणन महासंघाच्या मॉलमध्ये पंजाबच्या सोहना ब्रँड व अन्य उत्पादनांच्या विक्रीसाठी व्यवस्था तात्काळ उपलब्ध करुन देण्याचे निर्देश श्री. देशमुख यांनी दिले. पंजाब मार्कफेडच्या चंदीगड विक्रीकेंद्रात तात्काळ जागा उपलब्ध करुन देण्यात येईल, असे श्री. रंधावा यांनी सांगितले.

पंजाबमध्ये डिसेंबर महिन्यात बंदा सिंग बहादूर यांच्या शौर्याच्या निमित्ताने मोठ्या प्रमाणात उत्सव आयोजित केले जातात. यावेळी महाराष्ट्रातील कृषीमाल व अन्य प्रक्रियायुक्त पदार्थांचे मार्केटिंगसाठी सर्व ती मदत करण्यात येईल. १४ नोव्हेंबर रोजी पंजाब शासनाकडून सहकार दिन साजरा केला जातो. त्यानिमित्त १४ ते २० नोव्हेंबर दरम्यान आयोजित करण्यात येणाऱ्या सहकार सप्ताहामध्ये एका दिवसाच्या सत्रासाठी प्रमुख पाहुणे म्हणून सहकारमंत्री श्री. देशमुख यांना आमंत्रित केले.

प्रास्ताविक पणनमंत्र्यांचे विशेष कार्य अधिकारी डॉ. राजाराम दिघे यांनी केले. आभार श्री. पाहिनकर यांनी मानले. (‘महान्यूज’)